له UNDP څخه د ولسمشرغني غوښتنه؛
افغانستان له لوږې سره مخ دی مرسته راسره وکړئ
ولسمشر غني په افغانستان کې د ملګرو ملتونو د پراختیایي ادارې (UNDP) له مشر سره په لیدنه کې د یادې ادارې له مشره غوښتنه کړې ده
چې له افغانستان سره مرسته وکړي. له ارګه د خپرې شوې خبرپاڼې له مخې؛ ولسمشر، عبدالله الدرداري ته ویلي چې یو این ډي پي دې د افغان حکومت د هغو مهمو او ملي برنامو چې هدف یې له لوږې سره مبارزه او د افغانستان انکشاف سره مرسته ده، ملاتړ او همکاري وکړي څو په افغانستان کې د سولې د تامین او اقتصادي ودې لامل شي. ولسمشر غني زیاته کړې، د حکومت مهم لومړیتوب د افغانستان اقتصادي وده، د سولې تامین او ځان بسیاینه ده. هغه ویلي، د ملي دسترخوان او امنیتي میثاق په څېر د ملي برنامو پلي کېدل چې د خلکو په مشارکت اجرا کېږي افغانستان دې هدف ته نږدې کولی شي.
